§ Liber Psalmorum 92

1 Dominus regnavit, decorem indutus est: indutus est Dominus fortitudinem, et præcinxit se. Etenim firmavit orbem terræ, qui non commovebitur.

2 Parata sedes tua ex tunc; a sæculo tu es.

3 Elevaverunt flumina, Domine, elevaverunt flumina vocem suam; elevaverunt flumina fluctus suos,

4 a vocibus aquarum multarum. Mirabiles elationes maris; mirabilis in altis Dominus.

5 Testimonia tua credibilia facta sunt nimis; domum tuam decet sanctitudo, Domine, in longitudinem dierum.